བོད་མདོ་སྨད་ཁུལ་དུ་སློབ་མའི་འོས་ལངས། ཉེ་བའི་ལོ་གཅིག་གི་གོང་ནས་བཟུང་རྒྱ་ནག་གཞུང་གིས་བོད་ ཀྱི་ཆོས་དང་རིག་གཞུང་། སྐད་དང་ཡི་གེ་སོགས་མི་མངོན་པའི་ལམ་ནས་མེད་བརླགས་རྩ་གཏོར་གཏོང་ཐབས་ཀྱི་ལས་ འགུལ་ཞིག་སྤེལ་དང་སྤེལ་མུས་སུ་ཡོད་ལ། དེ་བཞིན་བོད་ཁུལ་གྱི་ས་གནས་ཡུལ་ལུང་སོ་སོའི་འབྲེལ་ཡོད་ལས་ཁུངས་ཁག་གི་ཁྱབ་ ཁོངས་སློབ་གྲྭ་རྣམས་ཀྱི་ནང་དུའང་། བོད་ཡིག་དེ་ཉིད་བེད་མེད་མཐོང་མེད་དུ་བརྩིས་ནས་བོད་སྐད་ཡིག་སློབ་དེབ་ཡོངས་ སུ་མེད་པ་བཟོ་རྒྱུའི་འཆར་ཟིན་དེ། ད་ཆར་དངོས་སུ་ལག་བསྟར་བྱ་བཞིན་ཡོད་པས། བོད་མི་རྣམས་ཀྱིས་བཙན་གནོན་དང་དྲག་ཤུགས་ཀྱི་ཁྲོད་ནས་མི་འདོད་པའི་རྣམ་འགྱུར་ ཤུགས་ཆེར་སྟོན་བཞིན་པ་དང་། ལྷག་དོན་མདོ་སྨད་ཁུལ་གྱི་ས་གནས་མང་པོ་ཞིག་ནས་ངོ་རྒོལ་སྐད་འབོད་ཤུགས་ཆེར་བྱེད་བཞིན་འདུག ཕྱི་ལོ༢༠༡༠ལོའི་ཟླ༡༠ཚེས་༡༩ཉིན་བོད་མདོ་སྨད་རེབ་གོང་ཁུལ་དུ་སློབ་ ཕྲུག་སྟོང་ཕྲག་བརྒལ་བས་མི་རིགས་འདྲ་མཉམ་དང་སྐད་རིགས་རང་དབང་ཞེས་པའི་འབོད་ ཚིག་འོག་ངོ་རྒོལ་འོས་ལངས་ཆེན་པོ་ཞིག་བྱས་འདུག དེ་ལ་རེབ་གོང་རྫོང་མི་རིགས་སློབ་འབྲིང་དང་། རྨ་ལྷོ་ཁུལ་དགེ་ཐོན་སློབ་གྲྭ རྨ་ལྷོ་ཁུལ་མི་རིགས་མཐོ་རིམ་སློབ་འབྲིང་གསུམ་གྱིས་གཙོས་པའི་སློབ་གྲྭ་ཆེ་ཁག་ ཚང་མའི་སློབ་མ་རྣམས་མཉམ་ཞུགས་བྱས་ཡོད་པས། སློབ་ཕྲུག་སྟོང་བརྒལ་བར་འདུག འབོད་ཚིག་ནི་མི་རིགས་འདྲ་མཉམ། སྐད་ཡིག་དར་སྤེལ་ཟེར་བ་དང་ཡང་མི་རིགས་འདྲ་མཉམ།སྐད་རིགས་རང་དབང་ཟེར་བ་དེ་རེད་འདུག ཉིན་དེར་རྒྱ་གཞུང་གི་དམག་མིའམ་ཉེན་རྟོགས་པ་རླངས་འཁོར་ཆེ་ཆུང་ཉི་ཤུ་སུམ་ཅུ་ ཙམ་ཐོན་ཡོད་ལ་གནས་སྐབས་འཛིན་བཟུང་སོགས་གང་ཡང་བྱས་མེད་ཚོད་འདུག