བོད་མི་རིགས་ཀྱི་ལུགས་སྲོལ་དང་གནའ་མིའི་རྣམ་རྟོག་གི་དཔུང་རོགས་ སུ་སྡེ་བ་རེ་ལ་བླ་རི་རེ་དང་བླ་རི་རེ་ལ་གཞི་བདག་རེ་གནས་ནའང༌། སྡེ་བ་འདི་ས་བགོས་ཆུ་བགོས་ཀྱི་དབང་གིས་ལོ་འགའི་སྔོན་ལ་ཐང་སྨད་དུ་ཆགས་ནས་ཐང་ སྨད་སྡེ་བ་ཞེས་སྡེ་མིང་གསར་བ་འདི་བཏགས་པ་ཡིན་ལ།སྡེ་བ་ཁ་འཐོར་གྱི་མི་ཡིན་པས་ ཁོ་ཚོར་གཅིག་གྱུར་གྱི་བླ་རི་མེད་པའི་ཁར་ཐང་སྨད་ན་དེའུ་འབུར་མཐོན་པོ་ཞིག་ ཀྱང་མེད་པས་གཞི་བདག་མེད་པའི་བླ་རི་ཞིག་འཚོལ་རྒྱུའང་དཀའ་མོ་ཡིན་ལ་དེ་ནི་སྡེ་ བ་སོ་མ་འདིའི་སེམས་ཁུར་སོ་མ་ཞིག་ཀྱང་ཡིན།ཐང་སྨད་སྡེ་བའི་མི་རྣམས་ཕན་ཚུན་ལ་ རྒྱུས་མངའ་མེད་ནའང༌།སྡེ་བ་འདིའི་རྩྭ་ས་རྩོད་གླེང་དང་པོའི་སྐབས་སུ་བསོད་ནམས་ ཐར་གྱིས་དཔའ་
རྟགས་དང་པོ་བསྟན་ནས།ཐང་སྟོད་སྡེ་བའི་གསར་བུ་འགའ་འཆི་རྨས་སུ་བཅུག་པ་དང་རྒད་ པོ་ཀླུ་རྒྱལ་འབུམ་གྱིས་གྱོད་བཤད་བྱས་ནས་ཁ་ལྕེ་ཡིས་རྒྱལ་ཁ་བླངས་པས་ཁོ་གཉིས་ ཀ་སྡེ་དཔོན་གྱི་འོས་གཞིར་བདམས་ཏེ་རྒད་པོ་ཀླུ་རྒྱལ་འབུམ་སྡེ་དཔོན་དང་བསོད་ ནམས་ཐར་རུ་དཔོན་ལ་བདམས་ཐོན་བྱུང་ནས་དཔའ་མཛངས་གཉིས་ལྡན་གྱི་སྡེ་བ་སོ་མ་ཞིག་ གྲུབ་ནའང་བླ་རི་དང་གཞི་བདག་གི་མགོན་སྐྱབས་མེད་པས།གྱོད་གཞི་གང་ལ་ཐུག་ཀྱང་ ལྷའི་དཔུང་རོགས་མེད་པའི་བློ་ཕམ་དེ་ཚང་མར་ཡོད་ལ་ལྷག་པར་དུ་སྡེ་དཔོན་དང་རུ་ དཔོན་གཉིས་ལ།དེ་དོན་གྱི་སེམས་ཁུར་སྡེ་མི་གཞན་ལས་ཀྱང་ཆེ་བས་གང་ནས་ཐུག་ཀྱང་ བླ་རི་དང་གཞི་བདག་གི་སྐད་ཆ་ལས་གཞན་བཤད་རྒྱུ་མང་པོ་མེད།
དེ་རིང་ཞོགས་པ་སྔ་མོར་ཨ་ཁུ་མཁས་གྲུབ་རྒྱུག་མ་འདུར་གྱིས་ཨ་ཁུ་སྡེ་དཔོན་ཚང་ལ་ ཡོང་ནས་འཛུམ་དམུལ་ལེར་གསུང་སྙན་ཞིག་ཡོད་པའི་བརྡ་བསྟན་ཀྱང༌། ཨ་ཁུ་སྡེ་དཔོན་གྱིས་དེ་ལ་དོ་སྣང་དེ་ཙམ་བྱེད་ཀྱིན་མི་འདུག ཁ་མུར་མུར་འགའ་བྱས་ནས། “སྡེ་དཔོན། ངས་མདང་དགོང་རྨི་ལམ་ཞིག་རྨིས་སོང༌།སྤྱིར་རྨི་ལམ་ལ་ངེས་པ་མེད་ནའང༌།ངས་ནམ་ རྒྱུན་ཁ་འདོན་རེ་བྱེད་ཀྱིན་ཡོད་པས་དེ་ལའང་བསམ་བློ་ཞིག་གཏོང་རྒྱུ་འདུག”ཅེས་ བཤད་པས། སྡེ་དཔོན་གྱིས་སྐུད་པ་ཞིག་གི་མདུད་པ་གྲོལ་བཞིན། “ཨི་ཧུ། ཤོད་ར” ཟེར། ཨ་ཁུ་མཁས་གྲུབ་ཀྱིས་ལག་པ་གཉིས་ཀས་ཕྲེང་བ་འཕུར་བཞིན།“ངའི་རྨི་ལམ་ལ་འབུར་རྟ་ མགོའི་ཐོད་ནས་སྦག་སྦག་ཞོན་ནི་ཞིག་གིས་ཐ་མག་རྐང་གཅིག་ལ་མེ་བགོས་པས།དུ་བ་ དགུང་སྔོན་གནམ་ལ་ཁྱབ་ཅིང༌།ཆང་དཀར་ཡོལ་གང་གནམ་ལ་མཆོད་པས་ཆར་བ་དང་ཁ་བ་མཉམ་དུ་ བབས་ནས་མེ་ཏོག་གི་དྲི་ཞིམ་གང་སར་འཐུལ། ང་ཚོའི་འབུར་རྟ་མགོ་ལ་གཞི་བདག་
ཅིག་འཁོར་ཡོད་པ་མིན་ནམ།ཡིན་ནའང་ཡ་མཚར་བ་ཞིག་ལ་མི་དེས་རྒྱ་སྐད་དག་དག་བཤད་པས་ ངས་ཅི་བཤད་ཀྱི་དོན་རྟོགས་མ་སོང”ཞེས་བཤད་པས། ཨ་ཁུ་སྡེ་དཔོན་གྱིས་སྐུད་པའི་མདུད་པར་སོ་འདེབས་ཀྱིན། “ཧ་ཧ། ངོ་མ་དེ་ཡ་མཚན་རེད། ཤི་རེ་གོ  ཁྱོད་ཀྱིས་རྒྱ་སྐད་གོ་ཚེ་ང་ཚོའི་སྡེ་བ་འདིར་དང་བླངས་གཞི་བདག་ཅིག་ཡོང་ཡོད་ན་ ཐང༌། ཧ་ཧ། དེ་ཡིན་ནའང་ང་ཚོར་རྒྱ་སྐད་ཤེས་མཁན་མེད་པས་ལོ་ཙཱ་བ་ཞིག་ཀྱང་འཚོལ་དགོས”ཟེར།