བོད་ཀྱི་ཁོར་ཡུག་སྲུང་སྐྱོབ་པ་གཉིས་ལ་རྒྱ་ནག་ཁྲིམས་ཁང་གིས་ཁྲིམས་ཞིབ་བྱ་ རྒྱུ་རེད།ཕྱི་ལོ༢༠༡༠ལོའི་ཕྱི་ཚེས་ ༢༠ ཉིན་ཨེ་པེ་གསར་ཁང་གིས་གནས་ཚུལ་སྤེལ་བ་ལྟར་ན། རྒྱལ་ཁབ་ཁ་བྲལ་གྱི་ཉེས་འཛུགས་འོག་འཛིན་བཟུང་བྱས་པའི་ཁོར་ཡུག་སྲུང་སྐྱོང་པ་ སྐུ་ཞབས་རིན་ཆེན་བསམ་འགྲུབ་ལགས་ལ་ཕྱི་ཚེས་ ༡༧ ཉིན་བོད་རང་སྐྱོང་ལྗོངས་ཆབ་མདོ་ས་གནས་ཁྲིམས་ཁང་གིས་ཁྲིམས་ཞིབ་བྱ་རྒྱུར་ཐག་ གཅོད་བྱས་ཡོད་ཀྱང་། ཚེས་ ༢༠ ཉིན་རྒྱ་གཞུང་གིས་རྒྱུ་མཚན་ཅི་ཡིན་འགྲེལ་བརྗོད་མེད་པར་རིན་ཆེན་བསམ་འགྲུབ་ ཀྱི་གྱོད་དོན་དུས་ཐོག་ཁྲིམས་ཞིབ་བྱ་རྒྱུར་ཕྱིར་འཐེན་བྱས་ཡོད་ཚུལ་ཁོང་གི་ ཁྲིམས་རྩོད་པས་བརྗོད་ཡོད་འདུག ཁ་སང་ཨེ་པེ་གསར་ཁང་གིས་ས་གནས་ཁྲིམས་ཁང་ལ་ཁ་པར་བརྒྱུད་ཁྲིམས་ཞིབ་ཕྱིར་འཐེན་ བྱས་པ་དེ་དཔང་རྟགས་མ་རྙེད་པའི་སྟབས་ཀྱིས་ཡིན་མིན་ཐད་སྐད་ཆ་དྲིས་སྐབས་ཕར་ ཕྱོགས་ནས་ལན་འདེབས་གང་ཡང་བྱས་མི་འདུག་ཅེས་བརྗོད་འདུག རང་ལོ་ ༤༤ ལ་སོན་པའི་རིན་ཆེན་བསམ་འགྲུབ་ལགས་ནི་ན་ནིང་ཕྱི་ཟླ་ ༨ པའི་ནང་གཅུང་པོ་འཇིགས་མེད་རྣམ་རྒྱལ་དང་དུས་གཅིག་ཏུ་རྒྱལ་ཁབ་ཀྱི་བདེ་འཇགས་ལ་ གནོད་སྐྱོན་བཟོས་པའི་ཉེས་མིང་འོག་འཛིན་བཟུང་བྱས་པ་ཞིག་ཡིན་ལ། འཇིགས་མེད་རྣམ་རྒྱལ་ལའང་ཟླ་ ༢༡ ཙམ་གྱི་བཙོན་འཇུག་ཁྲིམས་ཐག་བཅད་ཡོད་པ་རེད། སྤུན་མཆེད་གཉིས་བཀག་ཉར་བྱས་རྗེས་ལོ་འདིའི་ཕྱི་ཟླ་ ༡ པའི་ཚེས་ ༣ ཉིན་ཀརྨ་བསམ་འགྲུབ་ལགས་བཙོན་ཁང་དུ་ཕྱིན་ཏེ་དྲང་བདེན་མིན་པའི་གྱོད་དོན་དེར་ ཁ་ཆུ་རྒྱག་རྒྱུ་ཡིན་ཚུལ་བརྗོད་ཡོད་ལ། དེ་ནས་ཅུང་མ་འགོར་བར་ཁོང་ལའང་ཁྲིམས་འགལ་གྱིས་གནའ་རྫས་དབོར་འདྲེན་བྱས་པའི་ ཉེས་མིང་བཀལ་ཏེ་བཙོན་འཇུག་བྱས་ཡོད་ལ། དེ་རིང་ཚེས་ ༢༢ ཉིན་ཁོང་ལ་ཤིན་ཅང་ས་གནས་ཁྲིམས་ཁང་དུ་ཁྲིམས་ཞིབ་བྱེད་ཀྱིན་ཡོད་པ་རེད།